"Белорусский маячок" - сл. О. Хацкевич, муз. Олега Петкуна

"Дружба - славная планета" - сл. М. Климихиной, муз. Олега Петкуна (Дзержинский р-н)

Вам са мною ніколі не быць.
І мне з вамі не быць ніколі.
Кветкам шчасця не ззяць, не жыць
Ў чорным садзе чужога болю.
Ў валасах вашых ранні шэрань
Лёгкім водбліскам срэбра ззяе,
Быццам зоркі на чорным небе
Гэты водбліск душу кранае.
Вашай стомы нічым не сцешу
Акрамя дабрыні й спагады,
І прайду, колкі трэба пешшу,
Калі будзеце вы мне рады.
Толькі знаю: бясконца жыць
Немагчыма нам пад сінявою.
І мне з вамі ніколі не быць.

Соф'я Любанец (Нясвіжскі р-н)

Я лавiла цябе, быццам сонейка,
Што блiшчыць на азёрнай вадзе,
Толькi, як тыя пырскi халодныя,
Пралятаў ты скрозь пальцы мае.
Я лавiла цябе, быццам зорачку,
Што з нябёсаў уночы ляцiць,
Хаця, праўда, нiколi нiхто яшчэ
Тую зорку не здолеў злавiць.
I, як памяць пра цуда нязбыўнае,
Хай ляцiць да нябёсаў тваiх
Гэты даўнi i чысты, як iсцiна,
Развiтальны мой лёгкi уздых.
Можа, зловiш яго i адчуеш,
Дотык даўнi рукi трапяткой,
Можа, ўспомнiш, далёкую – тую,
Больш нiколi не быць мне якой.
...Ноччу чэрвеньскай цёмнае неба.
Рэдка знiчкi мiльгаюць па iм...
Тою рэдкай шчаслiваю знiчкай
Прамiльгнуў ты у небе маiм.

Соф'я Любанец (Нясвіжскі р-н)

Спыняе дзень свой хуткi бег,
I так пяшчотна, так старанна
На глебе лужыны, бы раны,
Як бiнт, хавае белы снег.
I беллю свецiцца абшар,
I ў цiшынi застыла голле.
Не мерзне – дрэмле наваколле
Ў чароўным сне зiмовых мар.
У харастве спачылi днi
I больш не точыць сэрца скруха.
I толькi чуйна ловiць вуха
Напеў зiмовай цiшынi.

Соф'я Любанец (Нясвіжскі р-н)

Нарадзiлася ў 1969 годзе ў Мiнску. Неўзабаве сям'я пераехала ў вёску Карцэвiчы Нясвiжскага раёна. Скончыла мясцовую школу, Нясвiжскае педагагічнае вучылiшча, працавала настаўнiцай пачатковых класаў у школах Мiнскага і Нясвiжскага раёнаў, i адначасова вучылася на фiлалагiчным факультэце БДУ.
У 1994 годзе пераехала ў Ляхавiцкi раён. Працавала на раённым радыё, ў раённай газеце “Ляхавiцкi веснiк”, выкладала родную мову i лiтаратуру. Пасля вяртання на Нясвiжчыну ў 2004 годзе працавала адказным сакратаром газеты “Нясвiжскiя навiны”, а зараз – загадчыца аддзела радыёвяшчання.
Друкавалася ў газетах "Ляхавiцкi веснiк”, “Нясвiжскiя навiны“, “Літаратура і мастацтва”. У 2007 годзе на абласным конкурсе аўтарскай песнi i паэзіі “Вiлейская хваля” атрымала другое месца.