Анатацыя на паэтычны зборнік

Увазе чытача прапаноўваецца кніга-трыялет, якая змяшчае вершы, напісаныя трыма яркімі паэтэсамі пад уздзеяннем сусветна вядомых выказванняў нідэрландскага мастака-постімпрэсіяніста Ван Гога.
У гэтым білінгвічным зборніку (два рускамоўныя аўтары - Ірына Карнаухава і Марына Шапавалава суседнічаюць з беларускамоўнай калегай паэтычнага цэху - Бажэнай Мацюк) сабраны своеасаблівыя творы-рэакцыі, творы-адказы на філасофскія цытаты эксцэнтрычнага жывапісца.
Што ні старонка – новы шчыры паэтычны водгук. Гэтыя вершы (часам – па-жаночаму эмацыйныя, часам – спакойныя і лаканічныя) – не спроба адлюстраваць чытачам сваімі словамі, “што хацеў сказаць аўтар”. Гэта ўнутрана перажытае і перафарбаванае ў асабістыя адценні зерне, што было закладзена калісьці Ван Гогам, але ўзрасло і ператварылася ў самастойнае дрэўца ва ўнутраных сусветах сучасных паэтаў.
Кніга аздоблена рэпрадукцыямі палотнаў мастака і рэкамендавана шырокаму колу чытачоў (як прыхільнікам выяўленчага мастацтва, так і беларускай паэзіі).

Вядучы рэдактар ДУ “Мінскі абласны цэнтр народнай творчасці” Таццяна Курмазія