У верасні б. г. г. Глыбокае Віцебскай вобласці прымаў гасцей на Рэспубліканскім свяце пісьменнасці і друку. Не хапае слоў, каб пераказаць усю веліч гэтага мерапрыемства і пералічыць колькасць працоўных калектываў, артыстаў, гасцей, якія прынялі ўдзел у свяце.
Горад напамінаў дзіўную, чароўную казку, у якой былі задзейнічаны літаральна ўсе вуліцы горада. Творчыя пляцоўкі ўражвалі незвычайным афармленнем, багатым зместам, разнастайнасцю вырабаў айчыннай і замежнай прамысловасці. Але галоўнае было ў тым, штоможна было бліжэй пазнаёміца з многімі вядомымі паэтамі, мастакамі, публіцыстамі з Беларусі і суседніх краін, якія прынялі ўдзел у некаторых мерапрыемствах.
Нават, як кажуць, нябесная канцэлярыя зжалілася і адмяніла ўсе прадказанні сіноптыкаў наконт дажджу. Сонечнае цёплае надвор’е і шчырыя ўсмешкі ўдзельнікаў і гасцей свята прыемна ўплывалі на настрой і жаданне, як мага больш убачыць прадстаўленне мастацкіх калектываў і зазірнуць у кожны адноўлены куточак горада. Многіх перапаўняў гонар за жыхороў г. Глыбокае, якія настолькі прафесійна змаглі арганізаваць такое незабыўнае, велічнае мерапрыемства, дзе і ўдзельнікі, і госці маглі цікава адпачыць і ў поўнай меры дакрануцца да гістарычнай і культурнай спадчыны не толькі свайго цудоўнага, азёрнага краю, але і ўвогуле нашай краіны.
Мне давялося прысутнічаць і выступаць на дадзенным мерапрыемстве, і убачанае ў Глыбокім асабліва ўразіла дасканалай падрыхтоўкай і найцікаўнейшым сцэнарыем.

Каб душою адчуць відавочнае,
Пакідала жыццё нездарма.
Даражэйшых мясцін, чым Глыбоччына,
Зразумела, у свеце няма.

Мне прыемна, што гэта Радзіма,
Хоць маленькая, але свая,
Дзе матуля мяне нарадзіла,
Смачным хлебам карміла зямля.

Частавала мядком і суніцамі,
Улетку песціла ценню бяроз
І змывала крынічнай вадзіцаю
След глыбокі ад горычных слёз.

Мне заўсёды яе не хапала
У няблізкай тае старане,
З асалодай спаткання чакала
На хвіліначку, нават у сне.

Бо, пры кожнай нашай сустрэчы,
Яна дорыць любоў да жыцця
І ўзлятаю, як птушка, дарэчы,
Пад уплывам таго пачуцця.

Пад час свята, мы яшчэ раз упэўніліся, што наша маленькая Радзіма – адзін з самых прыгожых куточкаў Беларусі, здольны аб’яднаць ўсіх, хто любіць жыццё, умее аддана працаваць на карысць нашай Радзіме, цэніць духоўныя здабыткі, садзейнічае ўмацаванню сяброўства з дружаснымі краінамі і ўпэўнена крочыць наперад у сферы культуры і мастацтва.

Галіна Мароз (г. Лагойск)