Ніколі, ні ў якім узросце не позна чаму-небудзь вучыцца: ці рабіць цікавае фота, ці добра валодаць кулінарыяй, ці паспрабаваць устаць на ролікі і г. д. Чым больш ты працуешь над гэтым, тым больш удасканальваецца майстэрства і тым больш атрымліваеш задавальнення. Вось і школа паэтычнага майстэрства – гэта і сустрэча з майстрамі, і добры вопыт, і новы погляд на свае вершы.
Шостага красавіка бягучага года ў выставачнай зале ДУ “Мінскі абласны цэнтр народнай творчасці” (г. Мінск, вул. Гікалы, 4) прайшоў майстар-класс для паэтаў народнага клуба кампазітараў і паэтаў “Жывіца”, на які была запрошана Іна Фралова – паэтка, член Саюза пісменнікаў Беларусі. Да гэтага “жывічане” былі знаёмы з ёй у большай ступені завочна: Анатоль Мяккі, кампазітар з Мінскага раёна, напісаў музыку да яе верша “Каханне”.
Сваю любоў да паэзіі гэтая прыгожая і энергічная жанчына нясе праз усё жыццё. Якое разнабаковае ўспрыняцце паэзіі! А якая ў яе чыстая і шчырая лірыка! Іна гадуе трох дзетак. Таму ўсе яе творы чулыя, прасякнутыя любоўю і пяшчотай да сучаснага свету і да дзіцяці. Так можа кахаць толькі матуля! Іна Фралова не толькі пазнаёміла слухачоў з уласнай творчасцю і адказала на пытанні, але сваім выступленнем паказала паэтам Міншчыны, як праводзяцца падобныя сустрэчы.
Напрыканцы майстар-класа цікавай паэтцы і галоўнай спецыялістцы Мінскага гарадскога аддзялення СПБ былі падораны некалькі клубных паэтычных зборнікаў.

Ірына Карнаухава
кіраўнік народнага клуба
кампазітараў і паэтаў “Жывіца”