З 11 па 13 чэрвеня горад Маладзечна сустракаў гасцёй ХХ Нацыянальнага фестываля беларускай песні і паэзіі “Маладзечна-2021”.
У цэнтры горада працавалі інтэрактыўныя пляцоўкі, разнастайныя выставы, свае вырабы дэманстравалі майстры... З канцэртнымі праграмамі выступалі не толькі калектывы горада і раёна, але і Мінскай і іншых абласцей краіны.
12 червеня разам з дэлегацыяй ГА "Саюз пісьменнікаў Беларусі" кіраўнік народнага клуба кампазітараў і паэтаў «Жывіца» Ірына Карнаухова і яго ўдзельнік, вілейчанін Уладзімір Цанунін, пабывалі ў в.Вязынка, на радзіме паэта Янкі Купалы, усклалі кветкі да помніка песняра, а пазней прысутнічалі на аўтарскай праграме заслужанага дзеяча культуры Беларусі Навума Гальпяровіча «Суразмоўцы». Потым яны ўдзельнічалі ў музычна-паэтычнай гасцёўні «Святло Радзімы. Радасць Перамогі", якую вялі першы намеснік старшыні Саюза пісьменнікаў Беларусі Алена Стэльмах і старшыня Мінскага гарадскога аддзялення СПБ Міхась Пазнякоў. Жвыічане на гэтым мерапрыемстве прачыталі свае вершы.


Акрамя таго, на канцэртнай пляцоўцы каля кінатэатра «Радзіма» удзельнікі клуба «Жывіца» выступілі з праграмай «Пад небам Бацькаўшчыны роднай», якую вёў член Саюза пісьменнікаў Беларусі, вілейскі паэт Віктар Кажура.


Шчырасць, лірычнасць, каханне, любоў да Радзімы, душэўны настрой і боль за лёс Бацькаўшчыны прагучалі ў песнях народных калектываў, музыка да якіх напісана кампазітарамі-жывічанамі. Першымі адкрылі праграму спявачкі народнага вакальнага ансамбля са Стаўбцоўшчыны "Берагіня". Яго кіраўнік -- Тамара Барэхава -- не толькі спеявала з імі, але і выступіла ў дуэце з Ірынай Пазняк. Прыемна было паслухаць некаторыя кампазіцыі, якія былі напісаны ў сутворчасці з паэтамі клуба.


Апладысментамі сустракалі жыхары Маладзечна народны калектыў аўтарскай песні "Элегія" пад кіраўніцтвам Таццяны Захарыч (г.Вілейка). Прагучалі музычная кампазіцыя на мелодыю Ігара Лучанка ў апрацоўцы Уладзіміра Лапціка і некалькі песен.


Народны калектыў -- эстрадная студыя аўтарскай песні "Імпэт" з Вілейшчыны -- падарыў слухачам некалькі кампазіцый на музыку кіраўніка калектыва Галіны Кутас.


Свае паэтычныя радкі для землякоў і гасцей фестываля прадставілі паэткі-живічанкі Тамара Бярэзіна і Тамара Аўсяннікава. Яскравым беларускім словам аздобілі музычныя нумары Галіна Нупрэчык з Клецка і вілейчане Віктар Кажура і Уладзімір Цанунін.


Іна Кузіна