Толькі яшчэ стала
На світанне брацца,
Як труба зайграла —
Раць ідзе за раццю.
Ой, свісталі шаблі,
Кулі ў рой спявалі,
Цяжкія гарматы
Жыцці забіралі.
Як у гэтай сечы
З раненькага рання,
Бы на Калцы — рэчцы,
Правіць смерць гулянне.
Умалот багаты:
Плёну — ды не хлеба:
Душамі салдатаў
Галасіла неба.
А надзей ні следу,
Як жа ў гэтым гвалце,
Дзе русіны, шведы,
Можна разабрацца.
Смерць усіх зрадніла
Многіх пабратала —
Цесная магіла
Родным домам стала.

Віктар Кажура, Бажена Мацюк (г. Вілейка)