У лесе грукат увесь дзень.
Дае канцэрт стары Алень.
Што ж, юбілейныя сустрэчы!
Дык пакажы ты спрыт хлапечы.
Прыбеглі ўсе звяры лясныя,
Каб паглядзець на цуды тыя.
Бас-гітарыст – бязрогі Лось.
Стаіць ён задуменны штось…
За фартэп’яна сеў Бабёр,
Усім вядомы ён акцёр.
Удод – на ўдарных інструментах,
І надта ж любіць кампліменты!
Крот на цымбалах спраўна грае.
Ён спрыт у гэтым тонкі мае.
Вітае публіка лясная:
Стары Алень аж расцвітае.
Сядзяць Сарокі, Казадоі
Ў партэры каля першай хвоі.
З дупла Вавёрка назірае,
Ад хвалявання замірае:
“Ну і Алень, ну і артыст,
А да таго і гумарыст!”
Сабраў ён шмат там гледачоў –
Аж не хапіла ўсім карчоў.
Іграе, песенькі спявае
І байкі ўсім распавядае.
На тое ён і юбілей,
Каб жыць было ўсім весялей.

Бандаровіч Ала (г. Стоўбцы)