Захацела баба Каця
Задарма разбагацець.
Пасадзіла дрэва ў хаце –
Хоча шмат мільёнаў мець.

Дзень і ноч яго пільнуе,
Перастала нават спаць.
Дрэва лашчыць і шануе…
Толькі грошай не відаць.

“Што за справа? – кажа баба. –
Калі ж грошы зазвіняць?”
А суседка: “Чула, жабу
На балоце трэба ўзяць”.

Каля рэчкі Каця жабу
Пільнавала пяць гадзін.
І гаротную за лапу
Прывязала да галін.

Зноў яна чакае грошы,
Бавіць марна час штодня.
Сумна жабцы – есці хоча,
На балоце ўся радня…

Дарагая наша Каця,
Годзе глупству давяраць!
Каб вяліся грошы ў хаце,
Трэба добра працаваць!

Круглик Людмила (г. Дзержинск)