Спяваюць сакавіцкія каты,
Падманлівыя песні пра каханне,
Зубастыя разінуўшы раты,
Прыродныя не тоячы жаданні.
Каціныя напевы пад акном
Загадкавае шчасце абяцаюць,
Мелодыі, што створаны хвастом,
Прэлюдыі, што спаць перашкаджаюць.
Паверыцца тым кошкам у любоў,
У вернасць, рамантычнасць і пяшчоту.
Спяюць каты, ды разбягуцца зноў,
Як здзейсняць натуральную работу.

Макарэвіч Барыс (г.Крупкі)