* * *
То адвёртку, то напільнік
Ён з кішені даставаў.
Працаваў… Але мабільнік
Зноў ад працы адрываў.

* * *
Мараць хлопчыкі пра акіяны,
Пра загадкавы і велічны Сусвет.
Сочаць за камп’ютарнай праграмай –
Вочы засланяе інтэрнэт.

* * *
Часам і такое ў жыцці бывае:
Жонка дружыць з кнігай, муж кніг не чытае.
Ён каля экрана – тут яму лацвей.
Толькі гэтым мужам кіраваць лягчэй.

* * *
Сцвярджае сябар, што кахаць
Умее сэрцам і ўчынкам,
Але не можа падабраць
Яму патрэбную жанчынку.

* * *
Пачынаў ён з пазітыва,
Дзе заўжды мажорны лад.
А ў канцы на негатыве
Завяршаў увесь даклад.

* * *
– Ваш талончык пакажыце.
– Вось талон мой… Бы ў кіно…
– Ваш талон даўно спажыты…
– Дык і еду ж я даўно.

* * *
– Навучыў брахаць сабаку, –
Пахваліўся мой сусед, –
Каб вясковы небарака
Не з’ядаў яго абед.

* * *
Каб хутчэй ляцелі дні,
Да суседа зазірні.
Што радня? Яна з наскоку,
А сусед заўсёды збоку.

Карпуць Яўген, г. Стоўбцы