Пра тваё каханне да мяне расказалі рукі,
Якія ў пяшчотна-ўзнёслай стоме
Дарылі спакой – сэрцу,
Радасць – целу.
Душы – акрыленасць.

* * *
Я прад табою стану на калені
І рукі зябкія да вуснаў прытулю –
Заззяюць вочы сонечным праменнем,
І рэха шчасцем адгукнецца:
Я – ЛЮБЛЮ!

* * *
Лёгкі дотык твайго дыхання
На дасвецці празрыста-веснім
(Праз бяссонныя ночы чакання)
Стаў бясконцаю ПЕСНЯЙ ПЕСНЯЎ…

* * *
Даруй – за дараванне,
За слёзы – уначы,
Вазьмі маё прызнанне
І – сэрца апячы.
Ім выпалі былое
Да попелу, датла…
Пусці ў душу СВЯТОЕ –
Каб з ім ты ажыла.

Кажура Віктар, г. Вілейка