Ціха шэпча лес калматы:
Восень завітала ў шаты,
Фарбаў назбірала розных
І чакае дзён марозных;
То падкіне барвы ў лісце,
Промнем сонечным ачысціць
След туманаў серабрыстых,
У лагчынках вадзяністых
Завіруе лісцем хутка,
То на купінах паўнюткі
Кошык ягад назбірае,
То грыбамі спакушае.
Слабым прымаразкам белым
На вадзе лядком нясмелым
Заблішчыць празрыстым шкельцам,
Як праменьчык у акенцы.
Дрэвы страцяць пышнасць фарбаў,
Медны колер зменіць барву,
І лісты пагоніць ветрам –
Затанцуюць у паветры
Толькі ім вядомы танец,
А рабінавы румянец
На галінках застанецца
Асалодаю для сэрца.

Бярэзіна Тамара (г. Маладзечна)