Прагне сэрца новых прыгод.
Да вяршынь далёкай гары
Хочацца ізноў у паход
З хатулём пайсці на зары

Пасярод лугоў і палёў,
Дзе легенда-казка жыве,
Не звяртаць на боль мазалёў,
Шыбаваць па чыстай траве,

Ад бетонных сцен уцячы,
Затаіцца ў яр за ляском
І каля цяпельца ўначы
Смакаваць гарбату з дымком.

І няхай грызуць камары
У палатцы ранняй парой,
Усё роўна будзе, сябры,
На душы бадзёры настрой.

Цанунін Уладзімір (г. Вілейка)