Асірацеў мой двор стары,
Дзе я, маленькая, скакала.
Узняўшы ручкі дагары,
Буслам я весела махала.

І дзе на прызбе пад акном
Паіла ляляк я кампотам,
А цёплым ласкавым дзяньком
Стары каштан шаптаў лістотай.

Дзе вішня спела за хлявом
І гусі важна гагаталі,
У загоне свінка з кабанком
Сабе штось смачнае шукалі.

Дзе ў градах блыталіся куры,
А я ганяла іх дубцом,
Дзе любая мая бабуля
Цукроўкі спорвала кійком.

Дзе куст півоняў ружавеў,
Цвіла шыпшына пад акном…
І свет дзяцінства аляцеў,
Што зараз не знайсці з агнём?

Няма хаціны, плоту, вішань…
І толькі сад жыве стары.
Ды цяжка, па-старэчы дыша,
Сумуе аб былой пары.

Бабко-Аляшкевіч Валянціна (в.Радкава, Салігорскі раён)