Мне прыснілася родная хата,
Дзе пад плотам вяргіня цвіла,
Дзе хадзілі ў двары тата з братам,
А бабуля з палетка ішла.

Я ў хаціне ля печы стаяла,
Там цыбулька вісела ў вянках…
Я вачыма бабулю шукала,
А душу ахапіў нейкі жах.

На вяроўках бялізна вісела,
Што намыла бабуля мая,
Я пазваць яе ціха хацела,
Каб сказаць, як люблю яе я.

Ні ў двары, ні на лаўцы, ні ў садзе
Я бабулі сваёй не знайшла,
Постаць знікла даўно ў даляглядзе,
І я, сумная, у хату пайшла.

Прыбірала яе, падмятала,
Посуд мыла, цыбульку зняла.
І чакала бабулю, чакала
Ды яна да мяне не прыйшла.

Потым нешта ў гародзе рабіла,
Штось капала, садзіла, мяла…
Ды без тых, каго моцна любіла,
Наша хата пустою была.

Бабко-Аляшкевіч Валянціна, в. Радкава, Салігорскі раён