Залатымі шарамі квітнее рудбекія –
Цёпла-жоўтыя яркія сонцы маленькія.
Маразамі зіма карані загартоўвае,
Сімвал сілы жыцця – зеляніна вясновая.
Выйшлі з моды даўно ўжо матуліны кветачкі,
Што ўпрыгожвалі ўлетку вясковыя веснічкі.
Каля вокнаў – лілеі заморска-гібрыдныя,
Елкі срэбныя, туі ды ружы блакітныя.
Не відаць гэтых ружаў за брамамі новымі
І вачэй у дамоў за платамі сталёвымі.
…Пасаджу краю роднага кветку нямодную
Побач з бела-ружовай лілеяй усходняю.
І заззяюць матуліны сонцы маленькія.
Адагрэе падворак і сэрца рудбекія.

Нупрэйчык (Плакса) Галіна, г. Клецк