Ах, восень! Музыкант і кампазітар!
На дыване з апаўшае лістоты
Ты сумна блюз сыграеш на гітары
І падбярэш для саксафона ноты.

Мелодыю падарыш сябру ветру,
І загучыць над задуменнымі лясамі
Ў празрыста-чыстым крамяным паветры
Хвала красуні з залатымі валасамі.

Памашуць крыламі з сінечы жураўлі –
Іх голас скрыпкаю тужліва адзавецца,
Бязмернай любасцю да роднае зямлі
Матыў атуліць трапяткое сэрца.

А на «Дажынках» так сыграеш на баяне,
Што сцішацца занудныя дажджы,
І ў промнях сонца на стракатым карнавале
Павесялішся ад усёй душы.

Сянюк Ларыса, в.Амельно, Пухавіцкі раён