Першая сняжынка у паветры кружыць,
Хмарай белай холад к нам плыве здаля.
Добры дзень, снег першы, мой зімовы дружа!
Добры дзень, зімовая, белая зямля!

Супыніся, вецер, супакойся, вецер,
Дай крануць бялюткі снегавы шацёр.
Не гайдай шалёна трапяткое вецце,
Музыкай чароўнай абудзі прастор.

Сустракай сняжынку, голая дуброва!
Першынцу далоні, рэчка, працягні!
Глянь: убор бялюткі –
чысты, светлы, новы –
Так ідзе да твару матухне-зямлі.

Зінаіда Гасціловіч (г. Валожын)