Здалёк прыйшла гісторыя Узды
У нашы дні, што кружаць апантана.
І скрозь пласты гадоў – яе сляды
У помніках, будынках мураваных.

Касцёл драўляны ведае майстроў,
Чыімі збудаваны быў рукамі.
Капліца-піраміда з камянёў
Завішаў памяць беражэ вякамі.

Блакітам ззяе купал на царкве
Апосталаў Святых Пятра і Паўла.
У краі курганоў сівых жыве
Легендаў шмат. Тут талентаў нямала.

Наркевіч-Ёдка край праславіў свой.
Да Бібліі уступ пісаў тут Будны.
Рассыпаны Кандратам Крапівой
Іскрысты гумар людзі не забудуць.

Цячэ ў Вусу Уздянкі водны шлях.
Віруе горад, кропелька Сусвету.
Радзіме прысвячаюць у вяках
Агонь душы пісьменнікі, паэты.

Нупрэйчык (Плакса) Галіна (г. Клецк)