Суквецці пунсовай герані
І фуксіі завушніцы.
Карункі бялюткіх фіранак,
Драўляныя аканіцы.
Вясёлыя вокны-вочы.
Высокая ліпа старая.
У сэрцы жыве той куточак,
Дзе болей ніхто не чакае
З палону падзей віртуальных,
Замкнёных кватэрных клетак,
Не кліча з вандровак дальніх
У мятна-мядовае лета.
Там бусел крыляе высока
Над морам зялёнай пшаніцы.
Калодзеж запросіць у спёку
Сцюдзёнай вадой наталіцца.
Там памяць ля веснічак родных
Блукае ў халодныя ночы –
І свецяцца шчыра, лагодна
Бацькоўскага дому вочы.

Нупрэйчык (Плакса) Галіна, г. Клецк