Я не ведаю мовы англійскай,
І нямецкай не ведаю я,
Для мяне самай важнай і блізкай
Стала родная мова мая.

Вы паслухайце, слоўцы якія:
Небасхіл, даспадобы, шамрэць,
Годзе, годнасць і роднасць, малыя,
Збожжа, зоркі, ажыны, гарэць…

Для мяне гэта музыкай грае,
Як пачую я мову сваю,
І яна мне настолькі святая,
Што ёй гімны ў вершах пяю.

Мне шкада, што яна ў заняпадзе,
Справаводства на ёй не вядуць,
Перспектывы няма ў даляглядзе…
Скруха ў сэрцы, і слёзы бягуць.

Бабко-Аляшкевіч Валянціна, в. Радкава, Салігорскі раён