Пагляд малады, фотакартка зжаўцелая –
Салдат не прыйшоў з вайны.
Без вестак прапаў, а матуля ссівелая
Пра сына ўсё бачыць сны.

Дзявятага мая, святочна прыбраная,
На плошчу ідзе хутчэй.
Трывожна ўглядаецца як апантаная
У твары чужых людзей.

Усю не абыдзеш зямлю мнагалюдную.
Ну дзе ж ты, крывінка, дзе?!
Ад болю заходзіцца сэрца пакутнае.
Ратунку няма ў бядзе.

Радзіма, о колькі прапала, загінула
Сыноў і дачок тваіх!
Крывавы свой след нам вайна пакінула.
Скалечыла лёсы жывых.

Нупрэйчык (Плакса) Галіна, г. Клецк