Брэсцкая вобласць, Чыжэўшчына (Крупчыцы), рака Трасцяніца

Рэчанька-рэча,
Ты – чалавеча!
Адчуваю твой сум і бяду,
Да цябе на размову іду.

Бачу зорныя вочы твае
У спрадвечна-сцюдзёнай вадзе.
Праз віхуры, сцяжыны-гады
Цягнеш рукі свае чараты!

Ой, рэчанька-рэча,
Ты – чалавеча!

Па палях ты няўцешна цячэш,
У глыбінях журботна нясеш
Кроў людзей беларускай зямлі,
Што ля водаў тваіх паляглі.

Рэчанька-рэча,
Ты – чалавеча!

Багавінне – твае валасы!
Не пабачуць таемнай красы
Тыя, хто свае душы аддаў,
Ад фашыстаў цябе ратаваў.

Ой, рэчанька-рэча,
Ты – чалавеча!
Адчуваю твой сум і бяду,
Да цябе на размову іду.

Раскажы аб жахлівай вайне,
Праспявай сваю песеньку мне.
Я паплакаць з табой захачу,
І малітву табе прашапчу…

Ой, рэчанька-рэча,
Ты – чалавеча!

Зізюлькіна Віялетта (г.Барысаў)