Залессе, Смаргонскі раён, Гродзенская вобласць

Зноў крочу я ў валошкавай сукенцы
Насуперак гадам. Нібыта ў сне…
Дзяцінства праз маленькае акенца
Пяшчотна дакранецца да мяне!

Гудзе цягнік, і кліча да сустрэчы
Рачулка з незвычайнай назвай Драй.
З малітвай-песняй шчыраю ўкленчу:
Залессе, Маладзечна, Гудагай!

На ветразях сяброўства і кахання
Імчу ў абшары страчаных дарог!
Шукаю крокі першага спаткання
І развітання першага куток.

Гучыць Залессе вечным паланэзам –
Вяртаюся сюды, як у сям’ю.
Загадкавым, дзіцяча-юным бэзам
Я прарастаю ў гэтую зямлю!

І час, і мроі праплываюць міма…
Віруе мудры лёс на срэбным дне –
Малая і вялікая Радзіма
Сваё натхненне шчодра дорыць мне!

Зязюлькіна Віялетта (г. Барысаў)