Фотаздымак таты
У руках трымаю
І трохкутнік,
Што дасланы быў з вайны;
На стале – медалі,
Іх перабіраю
Ў гэты цёплы ранак
Мірнае вясны.
Запісы ў блакноце
Татавай рукою
Зроблены ў акопах
Пад гарматаў гул.
У хвіліны тыя
Там была з табою
У малітвах мама –
Берагла ад куль.
Фотаздымак таты.
Ні адной маршчынкі,
Ўсмешлівыя вочы,
Бравы, малады…
Толькі вось чамусьці
Коцяцца слязінкі –
Апякаюць шчокі
Нават праз гады.

Нічыпаровіч Галіна (в. Магільна, Уздзенскі раён)