Адправім удачу ў палёт
І песню святла запяём.
Каб свята жыло круглы год,
Надзею запросім у дом.

Растане на сэрцы зіма,
Напоўніцца свет цеплынёй.
У радасці межаў няма,
Калі шчасце льецца ракой.

Дажджы напаілі зямлю –
Вясёлку ў далоні збірай.
Заветнае слова «люблю»
На вуснах аблокаў чытай.

У далеч давай паглядзім
І вывады зробім без слоў.
Свае галасы аддадзім
За веру, надзею, любоў.

Макарэвіч Барыс, г. Крупкі